主頁 » 資訊 » 日本賞花計畫 | 2023年上半年花期大合集及觀賞地點推介

日本賞花計畫 | 2023年上半年花期大合集及觀賞地點推介

2023-03-16

【資訊】HK Express x LikeJapan 日本上半年花期大合集及觀賞地點推介！日本每年除咗有各式各樣必去嘅傳統旅遊活動，全國各地唔同時間出現嘅花類盛放都係絕對不能錯過嘅！每個季節都可以見識到獨特嘅期間限定面貌。各位計劃去日本玩嘅朋友，不妨睇睇以下列表，搵啱一個最好嘅日子出發，欣賞群花盛放！

日本水仙（12月~1月） 日本水仙又被稱為「雪中花」，俾人一種喺大雪紛飛季節仍然努力綻放嘅印象。而位於長崎市野母崎町嘅水仙之丘公園係其中一個著名嘅賞花名所。園內有1000萬株日本水仙，喺12月下旬至1月下旬盛放；而喺公園北側展望所仲可眺望遠處嘅軍艦島。

花期：12月下旬至1月下旬
地點：長崎県長崎市野母町562-1　水仙の丘公園

梅花（2月下旬～3月上旬） 梅花比櫻花早大約一個月綻放。位於茨城縣嘅偕楽園係賞梅嘅好地方。同金澤嘅兼六園，岡山嘅後楽園並列為日本三名園嘅偕楽園，裡面植有100種共3000株梅花，會喺不同時期盛開，所以從1月下旬到4月上旬都可以觀賞到梅花。當中3月舉辦嘅點燈活動更加係喺偕楽園賞梅嘅一大重點活動！

予想花期：1月下旬至4月上旬
地點：茨城県水戸市見川1-1251 偕楽園

櫻花（3月中旬～4月上旬） 3月去日本賞櫻相信係唔少人去日本旅行嗰時有計劃過或者係好渴望做嘅事！被譽為「日本第一櫻」的弘前櫻花每年都吸引大約200萬人去觀賞。園內共有52種、約2600棵櫻花樹；無論係櫻花隧道、弘前城天守前、夜間點燈，定係落喺護城河的「花筏」，都絕對會令來訪者充分感受到日本最靚嘅櫻花景色！

滿開日予想：4月25日至4月27日
地點：弘前市大字下白銀町1　弘前公園

紫藤花（4月中旬～5月上旬） 春天嘅櫻花花期結束後，緊接就係迎接紫藤花花開嘅時候。足利花卉公園裡面有超過350株紫藤花，當中更加有樹齡超過150年嘅紫藤樹。來訪者可以喺晚間嘅點燈活動裡面，欣賞到被認定為日本夜景遺產之一嘅「夜之藤」。

花期：4月中旬至5月上旬
地點：栃木県足利市迫間町607 あしかがフラワーパーク

粉蝶花（4月至5月） 提起粉蝶花，唔少人會即時聯想到茨城縣嘅國營常陸海濱公園。園內每年4至5月會有多達450萬株粉蝶花盛放。紫藍色嘅小花將見晴之丘染藍，同蔚藍嘅天空融為一體；成為公園最盛大嘅藝術作品！

予想花期：4月中旬至5月中旬
地點：茨城県ひたちなか市馬渡字大沼605-4 国営ひたち海浜公園

玫瑰（5月上旬至5月中旬） 踏入夏天，就進入玫瑰盛開嘅季節。位於神奈川縣橫濱市嘅「橫濱英式花園」佔地2000坪，種植咗大約2200種玫瑰。園內設有「玫瑰&灌木園」同「玫瑰&香草園」等五個唔同嘅花園與及休息區，從春天至秋天都可以欣賞到唔同品種嘅玫瑰盛放。

花期：5月上旬至5月中旬
地點：横浜市西区西平沼町6-1 横浜イングリッシュガーデン

繡球花（6月中旬至7月中旬）
講到繡球花，相信唔少人都會諗起東京近郊嘅鎌倉。位於鎌倉嘅長谷寺種植咗40種以上、大約2500株繡球花。每年6月，藍、紫、粉色嘅繡球花都會開遍寺內嘅山坡同道路兩邊。而來訪者更可以喺「繡球花之征」近距離觀賞。

花期：6月中旬至7月中旬
地點：神奈川県鎌倉市長谷 3-11-2 長谷寺